មន្ត្រីរដ្ឋាភិបាលកម្ពុជាចំនួន៥រូបមកពី ក្រសួងបរិស្ថាន រួមជាមួយនឹងមន្ត្រីរដ្ឋាភិបាលនៃបណ្តាប្រទេសមេគង្គ នឹងធ្វើទស្សនកិច្ចទៅកាន់ប្រទេសជប៉ុនចាប់ពីថ្ងៃទី៣ ដល់ថ្ងៃទី១២
04-February-2020 | ដោយ ពលមនសិការ
ភ្នំពេញ៖ តាមរយៈការអញ្ជើញរបស់ក្រសួងការបរទេសជប៉ុន មន្ត្រីរដ្ឋាភិបាលកម្ពុជាចំនួន៥រូបមកពី ក្រសួងបរិស្ថាន រួមជាមួយនឹងមន្ត្រីរដ្ឋាភិបាលនៃបណ្តាប្រទេសមេគង្គ (ប្រទេសឡាវ ថៃ និងវៀតណាម) នឹងធ្វើទស្សនកិច្ចទៅកាន់ប្រទេសជប៉ុនចាប់ពីថ្ងៃទី៣ ដល់ថ្ងៃទី១២ ខែកុម្ភៈ ឆ្នាំ២០២០ ក្រោមកម្មវិធី បណ្តាញផ្លាស់ប្តូរសិស្ស និស្សិត និងយុវជនរវាងប្រទេសជប៉ុន និងបណ្តាប្រទេសអាស៊ីខាងកើតដែលហៅកាត់ថាJENESYS 2019។
មន្ត្រីប្រតិភូ នឹងចូលរួមកម្មវិធីផ្លាស់ប្តូរនៅក្រសួងបរិស្ថានជប៉ុន និងទៅទីក្រុងតូយ៉ាម៉ា ដែលជាទីក្រុងធ្លាប់មានបទពិសោធន៍នៃការបំពុលបរិស្ថានយ៉ាងធ្ងន់ធ្ងរ។ មន្ត្រីប្រតិភូ ក៏នឹងទៅទស្សនកិច្ចនៅមជ្ឈមណ្ឌលស្រាវជ្រាវវិទ្យាសាស្ត្របរិស្ថានខេត្តតូយ៉ាម៉ា និងសារមន្ទីរជម្ងឺអីតៃអីតៃខេត្តតូយ៉ាម៉ា ដើម្បីស្វែងយល់ពីបទពិសោធន៍ និងបច្ចេកវិទ្យាបរិស្ថាននៅទីនោះ។ ពួកគាត់ក៏នឹងទទួលយកបទពិសោធន៍នៃវប្បធម៌ជប៉ុនតាមរយៈការស្នាក់នៅជាមួយក្រុមគ្រសារជនជាតិជប៉ុនផងដែរ។សូមមើលតារាងព័ត៌មានលម្អិតស្តីពីកាលបរិច្ឆេទដែលមានភ្ជាប់។
កម្មវិធី JENESYS មានគោលបំណងជម្រុញការយល់ដឹង និងការកសាងទំនុកចិត្តទៅវិញទៅមកក្នុងចំណោមប្រជាជនជប៉ុន និងបណ្តាប្រទេសចូលរួម និងដើម្បីកសាងមូលដ្ឋានគ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត។ តាមរយៈកម្មវិធីនេះ ក្រសួងការបរទេសជប៉ុនបានអញ្ជើញយុវជនកម្ពុជាចំនួនជាង២១០០នាក់ហើយ តាំងពីឆ្នាំ២០០៧មក។
យើងខ្ញុំសង្ឃឹមថាអ្នកចូលរួមនឹងអាចយល់ដឹងអំពីប្រទេសជប៉ុនកាន់តែស៊ីជម្រៅថែមទៀត ព្រមទាំងចែករំលែកនូវបទពិសោធន៍របស់ខ្លួនឲ្យបានទូលំទូលាយទៅកាន់ប្រជាជនកម្ពុជា បន្ទាប់ពីវិលត្រលប់មកវិញ ៕
ចំនួនអ្នកទស្សនា
- ថ្ងៃនេះ3701
- ម្សិលមិញ15681
- សប្តាហ៍នេះ62541
- ខែនេះ84421
- ឆ្នាំនេះ84421
- សរុប20526877